283507
ມື້ນີ້
ມື້ວານນີ້
ອາ​ທິດ​ນີ້
ອາ​ທິດ​ທີ່​ແລ້ວ
ເດືອນ​ນີ້
ເດືອນທີ່ຜ່ານມາ
ວັນທັງຫມົດ
194
157
554
280813
4511
8678
283507
Your IP: 107.21.169.9
2018-12-18 15:01

 

 

ສາລະ​ວັນ ຝຶກ​ອົບຮົມ​ຄະນະ​ພັດທະນາ​ການ​ສຶກສາ​ຂັ້ນ​ບ້ານ​

ເພື່ອ​ສ້າງ​ຄວາມ​ເຂັ້ມ​ແຂງ​ໃນ​ຂະ​ແໜງ​ການ​ສຶກສາ

          ໃນຕອນເຊົ້າຂອງວັນທີ 26 ກັນຍາ 2018 ທີ່ຫ້ອງປະຊຸມສູນໄອຊີທີ ICT ແຂວງ ສາລະວັນ ໄດ້ຈັດກອງປະຊຸມຝຶກອົບຮົມຄະນະພັດທະນາການສຶກສາຂັ້ນບ້ານ, ຄະນະ​ກຳມະການ​ຈັດ​ຊື້ ​ແລະ ທິມງານ​ຄຸ້ມ​ຄ​ອງ​ໂຄງການ​ຂັ້ນ​ໂຮງຮຽນ ພາຍໃຕ້ໂຄງການ ການສຶກສາກ່ອນໄວຮຽນ ໂດຍພາຍໃຕ້ການເປັນປະທານຂອງ ທ່ານ ສົມ​ຈິດ​ ​ເພັງ​ສຸວັນນະ​ວົງ ຮອງຫົວໜ້າພະແນກສຶກສາທິການ ແລະ ກິລາ ແຂວງສາລະວັນ, ທ່ານ ປະສົງ​ໄຊ ພົມມະ​​ໄຊ​ສີ ຊ່ຽນ​ຊານ​ໂຄງການ​ປຸກ​ສ້າງ​ໂດຍ​ຊຸມ​ຊົນ​ເປັນ​ເຈົ້າ​ການ , ທ່ານ ໜູຄຳ ສີສະຫວັດ ຫົວໜ້າຫ້ອງການສຶກສາທິການ ແລະ ກິລາ ເມືອງ ສາລະວັນ, ທິມງານຂັ້ນກະຊວງ, ຂັ້ນແຂວງ, ຂັ້ນເມືອງ, ຄະນະພັດທະນາການສຶກສາຂັ້ນບ້ານຂອງເມືອງ ສາລະ​ວັນ, ​ເລົ່າ​ງາມ ​ແລະ ລະຄອນ​ເພັງ ເຂົ້າຮ່ວມຈຳນວນ 62 ທ່ານ.

            ໃນພິທີ ທ່ານ ສົມຈິດ ​ເພັງສຸວັນນະ​ວົງ ຮອງຫົວໜ້າພະແນກສຶກສາທິການ ແລະ ກິລາແຂວງກໍ່ໄດ້ໃຫ້ກຽດມີຄຳຄິດຄຳເຫັນຕໍ່ກອງປະຊຸມ ເຊິ່ງທ່ານໄດ້ກ່າວວ່າ ວຽກ​ປຸກ​ສ້າງ​ຫ້ອງ​ກຽມ​ປະຖົມ ​ແມ່ນ​ວຽກ​ໜຶ່ງ​ຂອງ​ໂຄງການ​ການ​ສຶກສາກ່ອນ​ໄວ​ຮຽນ, ຈຸກ​ດປະສົງ​ກໍ່​ແມ່ນ​ເພື່ອ​ສະ​ໜັບສະ​ໜູນ​ຂະ​​ແໜງ​ການ​ສຶກສາ ດ້ວຍ​ການ​ພັດທະນາ​ອາຄານ​ສະຖານ​ທີ່ ພາຍ​ໃນ​ໂຮງຮຽນ​ໃຫ້​ມີ​ຄວາມ​ເໜາ​ະສົມ ດັ່ງ​ນັ້ນ, ຄະນະພັດທະນາການສຶກສາຂັ້ນບ້ານຈົ່ງເອົາໃຈໃສ່ໃນການຝຶກອົບຮົມຄັ້ງນີ້ດ້ວຍຄວາມຕັ້ງໃຈເພື່ອຈະຖອດຖອນບົດຮຽນຮ່ວມກັນທັງ 3 ເມືອງຄືເມືອງ ສາລະວັນ, ​ເມືອງ ເລົ່າງາມ ​ແລະ ​ເມືອງ ລະຄອນ​ເພັງ ຮ່ວມກັບ ທິມງານກະຊວງ, ທິມງານຂັ້ນແຂວງ, ຂັ້ນເມືອງ ເພື່ອຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງພາລະບົດບາດທີ່ສໍາຄັນຂອງຄະນະພັດທະນາການສຶກສາຂັ້ນບ້ານທີ່ມີຕໍ່ຂະແໜງການສຶກສາເປັນຕົ້ນແມ່ນການເຂົ້າໂຮງຮຽນຂອງເດັກສຳລັບເຂດຫ່າງໄກສອກຫຼີກ, ບໍ່ມີໂຮງຮຽນຢູ່ພາຍໃນບ້ານ, ບໍ່ມີໂຮງຮຽນທີ່ເໜາະສົມ ຫຼື ເປັນໂຮງຮຽນທີ່ບໍ່ສົມບູນ, ບໍ່ມີຫ້ອງກຽມປະຖົມ, ຂາດຄູສອນຢູ່ກັບບ້ານ ອາຄານສະຖານທີ່ ແລະ ອຸປະກອນບາງຢ່າງໃນການຮຽນ - ການສອນ, ຊຸມຊົນບໍ່ທັນເຂົ້າໃຈຢ່າງເລິກເຊິ່ງກ່ຽວກັບຄວາມສຳຄັນຂອງຂະແໜງການສຶກສາ, ຄອບຄົວຍັງຂາດເຂີນບໍ່ມີທຶນສົ່ງລູກເຂົ້າໂຮງຮຽນ, ດັ່ງນັ້ນ, ເພື່ອແກ້ໄຂບັນຫາເຫຼົ່ານີ້ໂຄງການ ການສຶກສາກ່ອນໄວຮຽນ ແມ່ນຈະໄດ້ສະໜອງຫ້ອງກຽມປະຖົມພ້ອມເຟີນີເຈີ, ຫ້ອງນໍ້າ ແລະ ອຸປະກອນເຄື່ອງຫຼິ້ນ ເພື່ອດຶງດູດຄວາມສົນໃຈ ຂອງເດັກນ້ອຍທີ່ຈະເຂົ້າມາຮຽນ ແລະ ທີ່ສໍາຄັນກໍ່ແມ່ນຄະນະພັດທະນາການສຶກສາຂັ້ນບ້ານຕ້ອງໄດ້ເປັນເຈົ້າການໃນປຸກລະດົມພໍ່ແມ່ປະຊາຊົນໃຫ້ສົ່ງລູກຫຼານຂອງຕົນໄດ້ຮ່ຳຮຽນໜັງສື ໂດຍສົມທັບກັບອຳນາດການປົກຄອງຜູ້ບໍລິຫານການສຶກສາຂັ້ນເມືອງ, ຜູ້ອຳນວຍການໂຮງຮຽນ ແລະ ຄູອາຈານ ເພື່ອຊອກຫາວິທີການດຶງດູດຈິດໃຈ ແລະ ສ້າງຄວາມສົນໃຫ້ເດັກນ້ອຍຢາກຮຽນໜັງສືໃຫ້ຫຼາຍຂຶ້ນ.

            ທ່ານໄດ້ກ່າວຕື່ມອີກວ່າ: ໃນໄລຍະຂອງກອງປະຊຸມຝຶກອົບຮົມນີ້ ແມ່ນຮຽກຮ້ອງໃຫ້ຄະນະພັດທະນາການສຶກສາຂັ້ນບ້ານຈົ່ງປະຕິບັດໂມງເວລາຢ່າງເຂັ້ມງວດ, ມີບັນຫາໃດທີ່ຍັງຂ້ອງຄາໃຈກໍ່ໃຫ້ປຶກສາຫາລືແລກປ່ຽນເຊິ່ງກັນ ແລະ ກັນເພື່ອໃຫ້ມີຄວາມເຂົ້າໃຈຫຼາຍຂຶ້ນໃນການຈັດຕັ້ງປະຕິບັດໃນຕໍ່ໜ້າໃຫ້ເກີດດອກອອກຜົນ ແລະ ມີປະສິດທິພາບສູງບົນພື້ນຖານຄວາມສາມັກຄີ.

            ໃນບັ້ນຝຶກອົບຮົມຄັ້ງນີ້ ນັກສຳມະນາກອນກໍ່ຄືຄະນະພັດທະນາການສຶກສາຂັ້ນບ້ານ ຈະໄດ້ຮຽນຮູ້ກ່ຽວກັບພາບ​ລວມຂອງ​ໂຄງການ, ການຄຸ້ມຄອງບໍລິຫານ​ວຽກປຸກສ້າງ, ລະບົບ​ການ​ເງິນ​ຂອງ​ໂຄງການ, ວຽກສິ່ງແວດລ້ອມ ແລະ ຟອມກວດກາ, ການ​ນຳ​ໃຊ້​ເອກະສານ​ດ້ານ​ເຕັກນິກ ​ແລະ ຮ່າງ​ເອກະສານ ( ພາກ​ປະຕິບັດ​ຕົວ​ຈິງ ).

ກອງປະຊຸມຝືກອົບຮົມຄັ້ງນີ້ ແມ່ນຈະດຳເນີນເປັນເວລາ 3 ວັນຈຶ່ງຈະສໍາເລັດ.

  

 ຂ່າວໂດຍ: ແຫຼງຄຳ ບຸດນາໂຄກ

ອັບໂຫຼດຂ່າວໂດຍ: ໂອເລ້ ສິງຂາວເພັດ