ການເຄື່ອນໄຫວຕ່າງໆ

ແຈ້ງການທຶນການສຶກສາ

160410
ມື້ນີ້
ມື້ວານນີ້
ອາ​ທິດ​ນີ້
ອາ​ທິດ​ທີ່​ແລ້ວ
ເດືອນ​ນີ້
ເດືອນທີ່ຜ່ານມາ
ວັນທັງຫມົດ
208
141
349
159087
6632
8377
160410
Your IP: 54.225.18.67
2017-07-24 22:36

ພິທີຕ້ອນຮັບ ແລະ ສະຫຼຸບຜົນງານການເຂົ້າຮ່ວມແຂ່ງຂັນກິລານັກຮຽນມັດທະຍົມສຶກສາທົ່ວປະເທດ ຄັ້ງທີ VI ນົກກົກຄຳເກມ ທີ່ແຂວງ ບໍລິຄຳໄຊ

ໃນຕອນເຊົ້າຂອງວັນທີ 13 ກຸມພາ 2017 ຜ່ານມານີ້ ພະແນກສຶກສາທິການ ແລະ ກິລາແຂວງ ສົມທົບກັບອຳນາດການປົກຄອງແຂວງສາລະວັນ ໄດ້ຈັດພິທີຕ້ອນຮັບ ແລະ ສະຫຼຸບຜົນງານການເຂົ້າຮ່ວມງານມະຫະກຳກິລານັກຮຽນທີ່ສະໂມສອນໃຫ່ຍຂອງແຂວງ ໂດຍໃຫ້ກຽດເປັນປະທານຂອງ ທ່ານ ສີສຸວັນ ວົງຈອມສີ ກຳມະ ການສູນກາງພັກ,ເລຂາພັກ-ເຈົ້າແຂວງໆສາລະວັນ, ມີບັນດາທ່ານ ຮອງເຈົ້າແຂວງ, ຄະນະປະຈຳພັກແຂວງ, ກຳມະການພັກແຂວງ, ຫົວໜ້າ ແລະ ຮອງພະແນກການອ້ອມຂ້າງແຂວງ, ທ່ານຮອງເຈົ້າເມືອງ 5 ເມືອງ, ຫົວໜ້າຫ້ອງການສຶກສາທິການ ແລະ ກິລາເມືອງ, ຜູ້ອຳນວຍການໂຮງຮຽນ ພ້ອມດ້ວຍພະນັກງານຄູ-ອາຈານ ແລະ ນັກຮຽນ ເຂົ້າຮ່ວມທັງໝົດຈຳນວນ 150 ຄົນ ຍິງ 69 ຄົນ.

ໃນພິທີດັ່ງກ່າວ ໄດ້ຮັບຟັງການຂື້ນຜ່ານບົດສະຫຼຸບຜົນງານການເຂົ້າຮ່ວມແຂ່ງຂັນກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 6 ນົກກົກຄຳເກມ ຜົນງານຂອງນັກກິລານັກຮຽນຂອງແຂວງສາລະວັນ ໂດຍ ທ່ານ ສີລິສັກ ຖະໜອມຮັກ ກຳມະການພັກແຂວງ,ຫົວໜ້າພະແນກສຶກສາທິການ ແລະ ກິລາແຂວງ (ທັງເປັນຮອງປະທານສະມາຄົມກິລາ-ກາຍະກຳແຂວງ)

ໂດຍການຜ່ານບົດສະຫຼຸບໃຫ້ຮູ້ວ່າ: ແຂວງສາລະວັນ ໄດ້ຈັດສົ່ງຄະນະນຳ,ຄູເຝິກ,ກອງເລຂາ ແລະ ຄະນະສີລະປະເຂົ້າຮ່ວມທັງໝົດ 113 ຄົນ,ຍີ​ງ 31 ຄົນ (ຄະນະ​ນຳ 4 ທ່ານ,ສະຫະພັນ 7 ທ່ານ,ຄູເ​ຝິກ 11 ທ່ານ,ນັກ​ກິລາ 71 ຄົນ,ຍິງ 11 ຄົນ,ກອງ​ເລຂາ ​ແລະ ​ຮັບ​ໃຊ້ 7 ຄົນ,ຍິ 2 ຄົນ) ແລະ ສົ່ງ 7 ປະເພດກິລາເຂົ້າຮ່ວມຄື: ແລ່ນ-ລານ, ເປຕັງ, ບານເຕະ, ບານສົ່ງ, ກະຕໍ້, ໜ້າເກັກ ແລະ ດອກປີກໄກ່ ໂດຍນຳໃຊ້ງົບປະ ມານທັງໝົດໃນການເຂົ້າຮ່ວມງານ ແລະ ລວມທັງການເຂົ້ານອນສູນເຝິກແອບ ຈຳນວນ 670.721.000 ກີບ ຜ່ານການແຂ່ງຂັນໃນທຸກປະເພດກິລາ ແລະ ທຸກລາຍການນັກກິລາແຂວງສາລະວັນ ສາມາດຍາດໄດ້ 1 ຫຼຽນຄຳ, 1 ຫຼຽນເງິນ ແລະ 3 ຫຼຽນທອງ ໂດຍໄດ້ຈາກການແຂ່ງຂັນກິລາ ເປຕັງ (ລາຍການດຽວຍິງ 1 ຫຼຽນຄຳ) ໂດຍ ນາງ ພອນປີໃໝ່ ແກ້ວພິລາ,ເປຕັງ (ລາຍການຄູ່ຍິງ) 1 ຫຼຽນທອງ ໂດຍ ນາງ ພອນປີໃໝ່ ແກ້ວພິລາ ແລະ ນາງ ສະຫວັນເພັດ ພາສີ, ເປຕັງ (ລາຍການທີມຊຸດຊາຍ) 1 ຫຼຽນທອງ ໂດຍ ທ້າວ ​ພອນ​ສະຫັວດ ,ທ້າວ  ​ເຈ​ລະ​ວັນ ແລະ ທ້າວ  ຢູບີ .ກິລາແລ່ນ-ລານ 1 ຫຼຽນເງິນ ແລະ 1 ຫຼຽນທອງ (ລາຍການແລ່ນ 800 ແມັດ ແລະ ລາຍການແລ່ນ 1,500 ແມັດ) ທ້າວ ເພັດດາລາ ສຸ້ຍມະນີ ໂດຍຜົນງານດັ່ງກ່າວຖ້າທຽບໃສ່ການແຂ່ງຂັນກິລານັກຮຽນຄັ້ງທີ 5 ທີ່ແຂວງຈຳປາສັກເປັນເຈົ້າພາບ ຖືວ່າຄັ້ງນີ້ແມ່ນມີການພັດທະນາຂື້ນຢ່າງເປັນກ້າວໆ. ໃນນັ້ນການນຳຂອງແຂວງໄດ້ຊຸກຍູ້ທາງດ້ານງົບປະມານໃນການອັດຊີດນັກກິລາທີ່ໄດ້ຫຼຽນປະເພດຕ່າງໆ ແລະ ຄູເຝິກກິລາທີ່ມີຜົນງານດີເດັ່ນໃນແຕ່ລະສະຫະພັນ ລວມທັງໝົດຈຳນວນ 21,500,000 ກີບ ໂດຍອັດຊີດນັກກິລາທີ່ໄດ້ຫຼຽນຄຳຫຼຽນລະ 5,000,000 ກີບ, ນັກກິລາທີ່ໄດ້ຫຼຽນເງິນຫຼຽນລະ 3,000,000 ກີບ ແລະ ນັກກິລາກິລາທີ່ໄດ້ຫຼຽນທອງຫຼຽນລະ 1,500,000 ກີບ ສ່ວນຄູເຝິກນັກກິລາແມ່ນຜູ້ລະ 1,000,000 ກີບ ນອກນັ້ນຍັງມີບາງສະຫະພັນກິລາທີ່ໄດ້ປະກອບສ່ວນອັດຊີດໃຫ້ແກ່ນັກກິລາຕື່ມອີກເຊັ່ນ: ສະຫະພັນກິລາເປຕັງອັດຊີດຫຼຽນຄຳ 5,000,000 ກີບ ແລະ ຫຼຽນທອງ 2,000,000 ກີບ ແລະ ສະຫະພັນກິລາແລ່ນ-ລານ ອັດຊີດ 2,000,000 ກີບ. ໂອກາດດຽວກັນນີ້ການນໍາແຂວງ, ການນໍາພະແນກສຶກສາທິການ ແລະ ກິລາແຂວງ ແລະ ປະທານສະຫະພັນ ໄດ້ຜັດປ່ຽນການຂຶ້ນມອບເງິນລາງວັນ ແລະ ໃບຍ້ອງຍໍຕໍ່ນັກກິລາ,ຄູເຝິກ ແລະ ກົມກອງທີ່ປະກອບສ່ວນໃນການເຂົ້າຮ່ວມງານດັ່ງກ່າວຕາມລຳດັບ.

            ໃນຕອນທ້າຍຂອງພິທີ ທ່ານ ສີສຸວັນ ວົງຈອມສີ ກຳມະການສູນກາງພັກ,ເລຂາພັກ-ເຈົ້າແຂວງໆສາລະວັນ ໄດ້ໃຫ້ກຽດຂື້ນໂອລົມ ແລະ ມີຄຳເຫັນຕໍ່ພິທີໂດຍທ່ານໃຫ້ຮູ້ວ່າ: ກ່ອນອື່ນທ່ານໄດ້ຍ້ອງຍໍຊົມເຊີຍຕໍ່ບັນດານັກກິລາ,ຄູເຝິກ,ສະຫະພັນ ແລະ ທຸກພາກສ່ວນທີ່ສາມາດຍາດເອົາຜົນງານ ແລະ ໄຊຊະນະອັນໃຫຍ່ຫຼວງມາໃຫ້ແກ່ພໍ່-ແມ່ ປະຊາຊົນບັນດາເຜົ່າຊາວແຂວງສາລະວັນ ກໍ່ຄືວົງການກິລາຂອງແຂວງ ໂດຍທຸກພາກສ່ວນໄດ້ສະແດງອອກເຖິງນ້ຳໃຈເສຍສະຫຼະ ແລະ ຄວາມຮັບຜິດຊອບອັນສູງສົ່ງໃນການປະຕິບັດໜ້າທີ່ຂອງການແຂ່ງຂັນກິລາໃນປະເພດກິລາທີ່ຕົນເອງເຂົ້າຮ່ວມ

ນອກນັ້ນ ທ່ານ ສີສຸວັນ ວົງຈອມສີ ຍັງໃຫ້ຮູ້ຕື່ມອີກວ່າ: ສຳລັບຜົນສຳເລັດໃນຄັ້ງນີ້ ການນຳແຂວງ, ການຈັດ ຕັ້ງທຸກຂັ້ນ, ຕະຫຼອດຮອດ ພໍ່-ແມ່ ປະຊາຊົນບັນດາເຜົ່າຊາວແຂວງສາລະວັນ ແມ່ນມີຄວາມພາກພູມໃຈຫຼາຍທີ່ເຫັນຄະນະນຳ, ຄູເຝິກ ແລະ ນັກກິລາ ຍາດໄດ້ໄຊຊະນະໃນຫຼາຍປະເພດກິລາ, ຄະນະດຽວກັນ ທ່ານຍັງເນັ້ນໃຫ້ນັກກິລາ,ຄູເຝິກ ແລະ ສະຫະພັນກິລາຕ່າງໆ ຈົ່ງໄດ້ເອົາໃຈໃສ່ໃນການຫ້າງຫະກະກຽມຂະບວນການກິລາ ເພື່ອສືບຕໍ່ເຂົ້າຮ່ວມໃນງານມະຫະກຳກິລາແຫ່ງຊາດທີ່ແຂວງຊຽງຂວາງ ເປັນເຈົ້າພາບ ໃນປີ 2018 ແລະ ເພິ່ມທະວີຄວາມເອົາໃຈໃສ່ໃນການກໍ່ສ້າງພື້ນຖານ ແລະ ຂະບວນການກິລາ ໂດຍປຸກລະດົມມວນຊົນໃຫ້ມີຄວາມຕື່ນໂຕ,ໃຫ້ສັງຄົມກະຕຸກຊຸກຍູ້ສ້າງໃຫ້ຂະບວນການກິລາຂອງແຂວງໃຫ້ມີທ່າອ່ຽງຂະຫຍາຍໂຕຂື້ນເປັນກ້າວໆ ເພື່ອຮອງຮັບການເປັນເຈົ້າພາບທີ່ດີໃນງານມະຫະກຳກິລານັກຮຽນມັດທະຍົມສຶກສາທົ່ວປະເທດຄັ້ງທີ 7 ທີ່ແຂວງສາລະວັນ ຈະໄດ້ເປັນເຈົ້າພາບໃນປີ 2020. ນົດພົບກັນປີ 2020