283549
ມື້ນີ້
ມື້ວານນີ້
ອາ​ທິດ​ນີ້
ອາ​ທິດ​ທີ່​ແລ້ວ
ເດືອນ​ນີ້
ເດືອນທີ່ຜ່ານມາ
ວັນທັງຫມົດ
236
157
596
280813
4553
8678
283549
Your IP: 107.21.169.9
2018-12-18 15:16

ມອບ-ຮັບໂຄງການປັບປຸງລະບົບນໍ້າໃຊ້ໃນໂຮງຮຽນສາມັນກິນນອນຊົນເຜົ່າແຂວງ ສາລະວັນ

ໃນຕອນບ່າຍຂອງວັນທີ 7 ມີຖຸນາ 2018 ນີ້ ໂຮງຮຽນສາມັນກິນນອນຊົນເຜົ່າແຂວງສາລະວັນໄດ້ຈັດພິທີ ມອບ-ຮັບ ໂຄງການປັບປຸງລະບົບນໍ້າໃຊ້ໃນໂຮງຮຽນສາມັນກິນນອນຊົນເຜົ່າແຂວງ ຂື້ນຢ່າງເປັນທາງການ ໂດຍການໃຫ້ກຽດເຂົ້າຮ່ວມຂອງທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ, ທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກີລາແຂວງ, ທ່ານ ອາ ຢຸງ ຫົວໜ້າສະມາຄົມສະພາການຄ້າຈີນສາຂາ ຫູໜານ ປະຈຳແຂວງສາລະວັນ ພ້ອມຄະນະ ນອກນັ້ນຍັງມີ,ຫົວໜ້າ ແລະ ຮອງພະແນກການອ້ອມຂ້າງແຂວງ,ຮັກສາການຜູ້ອຳນວຍການ,ຄູ-ອາຈານ ແລະ ນັກຮຽນ ເຂົ້າຮ່ວມເປັນສັກຂີພະຍານ.

ໃນພິທີ ທ່ານ ສັງທອງ ອາດວິໄລ ຮັກສາການຜູ້ອຳນວຍການໂຮງຮຽນສາມັນກິນນອນຊົນເຜົ່າແຂວງໄດ້ຜ່ານບົດລາຍງານສະພາບການບໍລິຫານໂຮງຮຽນ ແລະ ບົດລາຍງານການກໍ່ສ້າງປັບປຸງລະບົບນໍ້າໃຊ້ໃນໂຮງຮຽນ ເຊິ່ງທ່ານໃຫ້ຮູ້ວ່າ: ການກໍ່ສ້າງປັບປຸງລະບົບນໍ້າໃຊ້ໃນໂຮງຮຽນແມ່ນໄດ້ຮັບທຶນຊ່ວຍເຫຼືອ ແລະ ປະກອບສ່ວນຈາກສະມາຄົມ ສະພາການຄ້າຈີນ ສາຂາ ຫູໜານ ປະຈຳແຂວງສາລະວັນ ເຊິ່ງການກໍ່ສ້າງປະກອບມີການເຈາະນໍ້າບາດານ 1 ບໍ່, ກໍ່ສ້າງຖ້ານຕັ້ງແທ້ງນໍ້າອ່າງສູງ 1 ຈຸດ ແລະ ຕິດຕັ້ງປໍ້າໄຟຟ້າ 1 ເຄື່ອງ.

 ການກໍ່ສ້າງປັບປຸງລະບົບນໍ້າໃຊ້ໃນໂຮງຮຽນ ໂຄງການດັ່ງກ່າວໄດ້ເລີ່ມລົງມືກໍ່ສ້າງໃນຕົ້ນເດືອນພຶດສະພາ 2018 ແລະ ສຳເລັດໃນວັນທີ 30 ພຶດສະພາ 2018. ການກໍ່ສ້າງໃນຄັ້ງນີ້ທາງສະມາຄົມໄດ້ວ່າຈ້າງບໍລິສັດເພື່ອຮັບເໝົາໃນການກໍ່ສ້າງຮ້ອຍສ່ວນຮ້ອຍເປັນມູນຄ່າ: 52.660.000 ກີບ (ຫ້າສິບສອງລ້ານຫົກແສນຫົກສິບພັນກີບ)

ຫຼັງຈາກນັ້ນ ທ່ານ ອາ ຢຸງ ຫົວໜ້າສະມາຄົມສະພາການຄ້າຈີນ ສາຂາ ຫູໜານ ປະຈຳແຂວງສາລະວັນ ໄດ້ໃຫ້ກຽດມອບລະບົບນໍ້າໃຊ້ ດັ່ງກ່າວໃຫ້ແກ່ໂຮງຮຽນ ຢ່າງເປັນທາງການ ໂດຍເປັນກຽດຮັບໂດຍທ່ານ ສີລິສັກ ຖະໜອມຮັກ ຫົວໜ້າພະແນກສຶກສາທິການ ແລະ ກິລາແຂວງ ເພື່ອມອບຕໍ່ໃຫ້ແກ່ທາງໂຮງຮຽນ ເພື່ອນໍຳໃຊ້ເຂົ້າໃນການພັດທະນາວຽກງານເຄື່ອນໄຫວຕ່າງໆຂອງໂຮງຮຽນໃນລຳດັບຕໍ່ໄປ. ພ້ອມດຽວກັນນັ້ນທາງສະມາຄົມຍັງໄດ້ມອບພັດລົມຕັ້ງພື້ນ ແລະ ພັດລົມແຂວນຝາໃຫ້ແກ່ທາງໂຮງຮຽນ ຈຳນວນ 8 ເຄື່ອງໃນມູນຄ່າ 1.200.000 ກີບ.

ໃນຕອນທ້າຍຂອງພິທີ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ ກໍ່ໄດ້ໃຫ້ກຽດຂື້ນໂອ້ລົມ ແລະ ມີຄຳເຫັນຕໍ່ພິທີດັ່ງກ່າວ ເຊິ່ງທ່ານໄດ້ກ່າວວ່າ: ການໄດ້ຮັບທຶນໃນການກໍ່ສ້າງປັບປຸງລະບົບນໍ້າໃຊ້ຂອງໂຮງຮຽນສາມັນກິນນອນຊົນເຜົ່າໃນເທື່ອນີ້  ຖືເປັນສັນຍາລັກແຫ່ງສາຍພົວພັນຮ່ວມມືອັນດີງາມລະຫວ່າງສະມາຄົມສະພາການຄ້າຈີນ ສາຂາ ຫູໜານ ປະຈຳແຂວງສາລະວັນ ກັບອຳນາດການປົກຄອງແຂວງ ກໍ່ຄືກັບຂະແໜງການສຶກສາຂອງແຂວງ ທີ່ໄດ້ປະກອບສ່ວນໃນການພັດທະນາຊັບພະຍາກອນມະນຸດໃຫ້ມີຄວາມຮູ້,ຄວາມສາມາດ ເປັນກຳລັງແຮງຊຸກດັນໃນການນຳພາປະເທດຊາດກ້າວສູ່ຄວາມ ຈະເລີນສີວິໄລໃນອະນາຄົດ.

            ຂ້າພະເຈົ້າຂໍຕາງໜ້າໃຫ້ຄະນະນຳຂັ້ນແຂວງ ຂໍຂອບ ໃຈຕໍ່ການປະກອບສ່ວນພັດທະນາວຽກງານການສຶກສາກໍ່ຄືການພັດທະນາໂຮງຮຽນສາມັນກິນຊົນເຜົ່າໃຫ້ໄດ້ຊົມໃຊ້ນ້ຳທີ່ສະອາດ ແລ ພຽງພໍຕໍ່ກັບການອຸປະ ໂພກ-ບໍລິໂພກພາຍໃນໂຮງຮຽນ ນອກນັ້ນຍັງຈະໄດ້ນໍາໃຊ້ເຂົ້າໃນການເຄື່ອນໄຫວນອກຫຼັກສູດໃນກິດຈະກຳອື່ນໆ ບໍ່ວ່າຈະເປັນການປູກຝັງ,ລ້ຽງສັດ.

ເພື່ອເປັນແຫຼ່ງສະໜອງອາຫານໃຫ້ແກ່ໂຮງຮຽນຢ່າງມີໂພຊະນາການຄົບຖ້ວນ. ນອກນັ້ນທ່ານຍັງໄດ້ຮຽກຮ້ອງໃຫ້ການຈັດຕັ້ງທຸກພາກສ່ວນຕ້ອງໄດ້ປຸກລະດົມການປະກອບສ່ວນເພື່ອເປັນການຊຸກຍູ້ພັດທະນາວຽກງານການສຶກສາຂອງໂຮງຮຽນ, ຮຽກຮ້ອງໃຫ້ຜູ້ບໍລິຫານໂຮງຮຽນຕະຫຼອດຮອດພະນັກງານຄູ-ອາຈານ ທັງໝົດຕ້ອງໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້ ໃນການຈັດຕັ້ງປະຕິບັດການຮຽນ-ການສອນທີ່ມີຄຸນນະພາບ ເພື່ອພັດທະນານັກຮຽນກໍ່ຄືການພັດທະນາວຽກງານການສຶກສາຂອງແຂວງ.

           

 ຂ່າວໂດຍ: ບຸນເກີດ ອິນທະນຸດ

ອັບໂຫຼດໂດຍ: ໂອເລ້ ສິຂາວເພັດ